रोका परिवारको अवस्थासम्बन्धी यही चैत १६ गते राससमा प्रकाशित समाचारपछि स्वदेश तथा विदेशबाट मृतकको परिवारलाई आर्थिक सहयोग आउने क्रम शुरु भएको छ ।
एउटै परिवारका तीनभाइ छोराको विदेशमा मृत्यु भएपछि विक्षिप्त बनेका रोकाका बुबाआमा र घर परिवारलाई आर्थिक सहयोगको आवश्यकता छ । मृतक रोकाका ७२ वर्षीय बुबा धनबहादुर रोका पक्षाघातबाट ग्रस्त हुनुहुन्छ भने र ६८ वर्षीया आमा लीलमति पेट र मुटुकी रोगी हुनुहुन्छ ।
मृतक रोकाको काजक्रिया गर्न र धनबहादुर र लिलमतिको उपचारका लागि आर्थिक अभाव भइरहेको समयमा कतारमा रहेका म्याग्देलीबाट ८० हजार ८३० र दरवाङवासीबाट संकलन गरिएको रकम गरी एक लाख ४५ हजार ८३० रोका परिवारलाई हस्तान्तरण गरिएको छ ।
दरवाङका वीरेन्द्र पुनमगरले कतारका साथै दरवाङमा समेत संकलन गरी एकमुष्ठ एक लाख ४५ हजार ८३० मृतकका साइला दाजु थमबहादुर रोकालाई हस्तान्तरण गरे । घरमा आर्थिक जोहो गर्ने कान्छो छोराको समेत मृत्यु भएपछि वृद्धवृद्धाको औषधोपचार तथा रेखदेखमा सघाउने उद्देश्यले आर्थिक सहयोग गरिएको पुनले बताए ।
मृतक रोका परिवारका चार भाइमध्ये जेठा तमबहादुर रोका, माइला भक्तबहादुर रोका र कान्छा धर्मलाल रोकाको विदेशमा सुतेकोसुत्यै मृत्यु भएको थियो । रोका परिवारको सहयोगका लागि देश विदेशमा रहेका म्याग्देली एवं संघसंस्थाले सहयोग अभियान शुरु गरेका छन् ।
Post a Comment