‘बंगलादेशका विवादित र कालो सूचीमा परेका कलेजले नेपाली दलाललाई मोटो कमिसन दिने गरेको देखिएको छ,’ उनले भने, ‘कमिसनको लोभमा दलालले विद्यार्थीलाई हुँदै नभएको जानकारी दिएर झुक्याउने गरेका छन्। जसका कारण पढिरहेका विद्यार्थीको भविष्य वर्वाद हुँदै गएको छ।’
दलालले झुक्याएकै कारण अहिले बंगलादेशका धेरै मेडिकल कलेजमा अध्ययनरत नेपाली विद्यार्थीले नेपाली दूतावासमा न्याय दिलाउन भन्दै निवेदन दिने क्रम बढ्न थालेको उनले जानकारी दिए।
उनका अनुसार बंगलादेशका यस्ता कलेजले दलाललाई प्रतिविद्यार्थी ३ देखि ५ लाख रुपैयाँसम्म कमिसन दिँदै आइरहेका छन्। ‘जति बढी कलेज विवादित र खत्तम छन्, त्यती बढी कमिसन दिने चलन रहेछ,’ डा बाँस्कोटाले भने, ‘त्यही भएर यहाँका एजेन्टले पनि कमिसनका लागि त्यस्तै कलेजमा विद्यार्थी लैजान हुँदै नभएका आश्वासन दिलाउने गरेका रहेछन्।’
नेपाली दूतावासको माध्यमबाट काउन्सिलमा आएको जानकारी अनुसार दलाल र गुणस्तरहीन कलेजहरुको मिलेमतोमा कोटाभन्दा बढी विद्यार्थी भर्ना गराउँदै आएका छन्। यस्तै, भर्ना रोक्का भएका कलेज र बंगलादेशको मेडिकल काउन्सिलले दर्ता नम्बर नदिएका कलेजले पनि विद्यार्थीलाई विभिन्न बहानामा अध्ययापन गराउँदै आएका छन्। विद्यार्थीले गुनासो गरेमा धम्की दिने, शुरुमा शुल्क एकथरी देखाउने र विद्यार्थीबाट विभिन्न शीर्षकमा बढी रकम असुल्ने लगायतका समस्या विद्यार्थीले भोग्दै आइरहेका छन्।
डा बाँस्कोटाका अनुसार बंगलादेशमा विदेशी विद्यार्थीलाई ३० प्रतिशत कोटा छुट्टाइएको हुन्छ। तर, कलेजहरुले दलालसँग मिलेर उक्त कोटाभन्दा बढी विद्यार्थी भर्ना गर्दै आइरहेको भेटिएको छ। यसरी कोटाभन्दा बाहिर पढेका विद्यार्थीले मान्यता नै पाएका छैनन्।
‘पैसाको लोभमा दलाल र कलेजले विद्यार्थीको भविष्यमाथि खेलबाड गरिरहेका छन्,’ अध्यक्ष डा बाँस्कोटाले भने, ‘त्यसकारण विद्यार्थीले दलालको पछाडि लागेर बंगलादेशका निजी कलेजमा पढ्न नजानु नै उत्तम हुन्छ।’
उनले हालै नेपाली दूतावासको सहयोगमा नेपाली विद्यार्थी पढ्न जाने ३७ वटा कालोसूचीमा रहेका कलेजको लिस्ट प्राप्त भएको जानकारी दिए। कालोसूचीमा रहेका ती कलेजमा कुनै पनि विद्यार्थीलाई पढ्न नजान उनले आग्रह गरेका छन्।
Post a Comment